Хөдөлмөрийн гавьяаны улаан тугийн одонт

Эрхэм зорилго

Эх орны хөгжлийн баталгаа

Эрчим хүчний хүчирхэг тулгуур нь байна.

Хэтийн зорилго

"ДЦС-4" ТӨХК 2023 он гэхэд инновацид суурилсан эрчим хүчний цогц бүтээгдэхүүн ажил үйлчилгээтэй шилдэг компани болно.

Мэндчилгээ

С.Анхбаяр

Гүйцэтгэх захирал

Станцын маань суурь 1979 онд тавигдаж, 1983 оноос цахилгаан, дулааны эрчим хүчийг боловсруулж түгээж эхэлсэн билээ. Өнөөгийн байдлаар манай станцын цахилгааны суурилагдсан хүчин чадал 703мВт, дулааны суурилагдсан хүчин чадал 1373Гкал/ц байгаа бөгөөд Төвийн бүсийн цахилгаан эрчим хүчний хэрэглээний 67,3 орчим хувийг, Улаанбаатар хотын дулааны эрчим хүчний 60,3 орчим хувийг дангаараа хангаж байна.

Эрчим хүчний салбарын хөгжлийн төлөө хоёргүй сэтгэлээр зүтгэж ирсэн ахмадууд, өнөөгийн станцын маань бэлтгэгдсэн чадварлаг боловсон хүчин бидний бахархал юм.

Манай хамт олон орчин цаг үетэйгээ хөл нийлүүлэн шинэ техник, технологийг нэвтрүүлэн ард түмэндээ хамгийн эрэлт хэрэгцээтэй бүтээгдэхүүн болох дулаан цахилгааны эрчим хүчээр тасралтгүй, найдвартай хангах үүргээ нэр төртэй биелүүлсээр ирсэн. Цаашид ч бид хэрэглэгчийн эрх ашгийг дээдэлсэн байгаль орчинд ээлтэй үйлдвэрлэл явуулж, харилцагч нарынхаа өмнө хүлээсэн үүргээ нэр төртэй биелүүлж, бүтээгдэхүүний тоо хэмжээ, чанарын үзүүлэлтээрээ эрчим хүчний салбарын үйлдвэрүүд дотроос хамгийн шилдэг нь байхын төлөө чармайн ажиллах болно.

Сайн үйлс улам дэлгэрэх болтугай.

КОМПАНИЙН ТУХАЙ

“ДЦС-4” ТӨХК-ийн суурийг 1979 онд тавьж, 1983 онд эхний агрегат, 1987 онд төслийн буюу 380 МВт-ын хүчин чадлаар ашиглалтанд орж улмаар 1988-1990 онуудад 160 МВт-ын, 2007, 2009 онд тус бүр 20 МВт-ын, 2012-2014 онд 120 МВт-ын өргөтгөл хийгдэн, нийт 703 МВт-ын цахилгаан эрчим хүчний, 1373 Гкал дулааны эрчим хүчний суурилагдсан хүчин чадалтай ажиллаж байна.

Суурилагдсан тоноглолын техникийн үзүүлэлтүүд

Станцын төрөл, ангилал: Хөндлөн холбоос бүхий 8 зуух, 7 турбинтэй цахилгаан, дулаан хослон үйлдвэрлэх схемтэй;

Уурын генератор: Цагт 500 тонн өндөр параметртэй (140 кгс/см2, 560оС) уур үйлдвэрлэх хүчин чадалтай БКЗ-420-140-10С (ОХУ) маркын 4 зуух, цагт 420 тонн өндөр параметртэй (140 кгс/см2, 560оС) уур үйлдвэрлэх хүчин чадалтай БКЗ-420-140-10С (ОХУ) маркын 4 зуух;

Уурын турбин: Цагт 100 МВт цахилгаан эрчим хүч, 175 Гкал дулааны эрчим хүч үйлдвэрлэх хүчин чадалтай Т-100-130 (ОХУ) маркийн зөвхөн дулаацуулгын (отбор) авлагатай 3 турбин, цагт 100 МВт цахилгаан эрчим хүч, 220 Гкал дулааны эрчим хүч үйлдвэрлэх хүчин чадалтай ПТ-80-130 (ОХУ) маркийн үйлдвэрийн болон дулаацуулгын (отбор) авлагатай 2 турбин, мөн цагт 80 МВт цахилгаан эрчим хүч, 220 Гкал дулааны эрчим хүч үйлдвэрлэх хүчин чадалтай ПТ-80-130 (ОХУ) маркийн үйлдвэрийн болон дулаацуулгын (отбор) авлагатай 1 турбин, цагт 120 МВт цахилгаан эрчим хүч, 188 Гкал дулааны эрчим хүч үйлдвэрлэх хүчин чадалтай Т-120/130-130-8МО (ОХУ) маркийн үйлдвэрийн болон дулаацуулгын (отбор) авлагатай 1 турбин;

“ДЦС-4” ТӨХК нь төвийн бүсийн цахилгаан эрчим хүчний 67,3 хувь, Улаанбаатар хотын дулааны эрчим хүчний хэрэглээний 60,3 хувийг дангаар хангадаг Монгол Улсын эрчим хүчний хамгийн том үйлдвэр юм.

Тус үйлдвэрийн харъяанд 3-20 км алслагдсан үнс хадгалах сан болон техникийн ус хангамжийн насос станц мөн түүнчлэн ахуй үйлчилгээний, инженерийн, лаборатори туршилтын төв зэрэг 66,7 га талбай бүхий 74 барилга байгууламж багтдаг.

2001 оны 8-р сараас Төрийн өмчийн Хувьцаат Компани болж, хувьцааны 41 хувийг ЭХЯам, 39 хувийг Төрийн өмчийн бодлого зохицуулалтын газар, 20 хувийг Сангийн яам тус тус эзэмшиж байна.

Үйлдвэрлэл, технологийн 6 цех, механик боловсруулалтын 1 цех, Үйлдвэрлэлийн, Засварын, Судалгаа Хөгжлийн гэсэн техникийн 3 алба, Захиргаа хүний нөөцийн алба, Эдийн засаг санхүүгийн алба, Хяналтын алба, Борлуулалт маркетингийн алба гэсэн захиргааны 4 алба, Худалдан авах ажиллагааны, Нийгэм ахуйн гэсэн 2 хэлтэс, Цехийн эмнэлэг, Зоогийн газар, Авто аж ахуй гэсэн нэгжүүдийн зохион байгуулалттай үйл ажиллагааны холимог бүтэцтэй ажил үйлчилгээ явуулдаг.

2016 оны байдлаар нийт 1492 ажиллагсадтай ажиллахаас дансны дунджаар 1477 ажиллагсадтай ажилласан. Түүнээс 292 ажилтан нь инженер техникийн ажилтан байна.

Түүхэн зурагнууд

Баримтат кино