Эрчим хүчний салбар үүсч хөгжсөний түүхт 95 жилийн ойн хүрээнд Инженер, техникийн ажилтнуудын зөвлөгөөн Улаанбаатар хотноо зохион байгуулагдлаа. Зөвлөгөөнд төрийн болон хувийн хэвшлийн нийт 56 үйлдвэр, компанийн 250 орчим инженер техникийн ажилтнууд оролцож, эрчим хүчний системийн өнөөгийн төлөв байдал, хэрэглээ, системийн горим ажиллагаа, аюулгүй байдал, салбарт хэрэгжиж буй бүтээн байгуулалт, төр, хувийн хэвшлийн үйлдвэр компаниудад тулгамдаж байгаа асуудлууд, тэдгээрийг зөв зохистой шийдвэрлэх тухайд санал бодлоо солилцлоо.

Эрчим хүчний яамны Бодлогын хэрэгжилтийг зохицуулах газрын дарга Б.Насантогтох “Монгол Улсын Эрчим хүчний салбарт нэн тэргүүнд шийдвэрлэх асуудлын нэг нь суурилагдсан хүчин чадлаа нэмэгдүүлэх хүрээнд шинэ эх үүсвэрүүдийг барьж ашиглалтад оруулах юм. Энэ зорилтын эхлэл тавигдаж, өргөтгөлийн ажил эхлээд байна. Мөн баруун, зүүн өмнөд бүс болох нийт 11 аймгийг дөрвөн эх үүсвэрээр холбосон цахилгаан дамжуулах агаарын шугамыг зургаан жилийн хугацаанд дуусгах төслийн ажлыг хэрэгжүүлнэ” гээд салбарын бүтээн байгуулалтын талаар мэдээлэл өглөө.

Эрчим хүчний дэд сайд Т.Гантулга “Эрчим хүчний салбарт 10 мянга гаруй инженер, техникийн ажилтан бий. Тэдний төлөөлөл болсон 250 гаруй инженер, мэргэжилтнүүд өнөөдөр цугларч, салбарын өнөөгийн байдал, тулгамдаж буй асуудлаа ярилцан шийдвэрлэх арга замын тухайд саналаа солилцож байна. Эрчим хүчний салбарын инженер техникийн ажилтнууд бол салбарынхаа амин судас байдаг. Тэр утгаараа үгийг нь сонсож, санал бодлыг нь үйл ажиллагаандаа тусгах нь бидний үүрэг, хариуцлага гэж ойлгож байна” гэв.

http://energy.gov.mn/c/723

Эрчим хүчний салбарын инженер, техникийн ажилтнуудын зөвлөгөөн боллоо…